NENO LA SIKU

Na Mtume na Nabii Josephat Elias Mwingira, Kanisa la Efatha

Tarehe: 20/11/2024

SOMO: MUNGU ANAKUPA WA KUFANANA NA WEWE

Mwanzo 2:18 "BWANA Mungu akasema, Si vema huyo mtu awe peke yake, nitamfanyia msaidizi wa kufanana naye."

Jinsi ulivyo na tabia ulizonazo ndizo zitaamua ni mtu gani aje katika maisha yako. Kama unataka mume wako abadilike wakati wewe mwenyewe haujabadilika sahau yeye kubadilika. Kama unataka mkeo abadilike wakati wewe mwenyewe ni mkora, usiende mbele za Mungu na maombi ya aina hiyo kwa maana hautapata majibu. Kama unataka kuona mume au mke wako akibadilika basi amua kubadilika wewe kwanza, lakini usipobadilika basi sahau yeye kubadilika.

Unakuta mtu anasema Mungu nipe mume na huyo mume nataka awe Mtumishi wako je! Wewe ni Mtumishi wa Mungu? Wengine unakuta wanaomba “Mungu nipe mume au mke mwenye lugha nzuri” je! Wewe unayo lugha nzuri? Au unasema "nataka mwenye kumpenda Mungu ili tuabudu pamoja," je! Wewe unampenda Mungu? Wengine wanasema nipe mume mwenye pesa, je! Wewe unazo?

Biblia inasema Mungu atakupa wa kufanana na wewe, jinsi ulivyo, tabia ulizonazo Mungu atakupa wa kufanana na wewe hivyo hivyo. Kama unataka Mungu akupe kile unachokitaka badilika uwe vile unataka kwanza ili Mungu akupe wa kufanana na wewe. ...

NENO LA SIKU.

Na, Mama Eliakunda Mwingira - Kanisa La Efatha

TAREHE: 19/11/2024

SOMO: NAMNA YA KUFIKIA BARAKA ZETU KATIKA KUTII MAAGIZO

Isaya 1:19 “Kama mkikubali na kutii mtakula mema ya nchi;”

Utii maana yake ni nini? Ni kufanya sawa bila maswali, utii ni amri haibadiliki, utii ni sheria, kutii ni lazima hakuna mjadala; kama hauwezi kumtii Mungu na kuzitii sheria zake basi hautaweza kutiisha chochote kikakutii hapa chini ya jua.

Kukosa utii ni sawa na kuwa na shoka ambalo halina mpini.
Yakobo 4:7 “Basi mtiini Mungu. Mpingeni Shetani, naye atawakimbia.” Usipomtii Mungu kamwe hautaweza kumkimbiza ibilisi na yeye akakimbia, bali atakaa nyumbani kwako, kazini kwako, kwenye biashara zako na kila mahali katika maisha yako, kwa nini? Kwa sababu wewe sio mtii hivyo hauwezi kumtiisha.

Unakuta vitu haviendi kwa sababu wewe mwenyewe haujakubali kumtii Mungu hivyo ibilisi hawezi kuondoka katika maisha yako.

Mungu ndiye mwenye vyote unavyovihitaji, ana mume/ mke wako, watoto wako kazi au biashara nzuri unayoitaka, sasa kama hauwezi kumtii, je! Utavipataje hivyo?

Utajuaje kuwa hauna utii? Uwepo wa ibilisi utakuwa na wewe, atakusumbua kupitia magonjwa, umasikini, ukata na mateso ya kila aina, utakuwa mtu uliyekwama katika kila unachokifanya hakiendi.

Walokole sisi ni hodari sana kusema shindwa shetani, toka, lakini unapaswa kujua kuwa usipotii hata ukikemea ibilisi anakuangalia tu wala hashituki, neno linasema mtii Mungu halafu ukifika katika kumpinga ibilisi wala hautumii nguvu. ...